جݙاں یاد تیݙی دا چن چڑھدے پلکاں تے ستارے بل ویندن

نعت شریفؐ —————————— عبداللہ یزدانی

تیݙے ناں دا ورد کرینداں تاں میݙے سارے ݙکھڑے ٹل ویندن

کتھ عرشِ بریں کتھ فرشِ زمیں کتھ قابَ قوسین او ادنیٰ

میݙا پاک نبیؐ اُتھ پہنچا ھے ڄتھاں پر جبریل دے جل ویندن

سب جھولیاں بھر بھر ٹُر ویندن اتھاں پتھر وی بݨ دُر ویندن

ڄیڑھے آندن ایں دروازے تے کوݨ آدھے خالی ول ویندن

ہݨ بھیج مدینے توں مولاؐ کوئی بدلی آپݨے ساوݨ دی

میکوں بہہ بہہ تتیاں دھپاں تے ایویں روز پچھاویں ڈھل ویندن

میݙے لکھ سلام درود ہوون اوں پاک نبیؐ تے یزدانی

ڄیندو گِھن سوغات دروداں دی جِن،اِنس،مَلک،مرسل ویندن