رفیق ساگر

سئیں رفیق ساگر
ناں	محمد رفیق
تخلص	ساگر
قلمی ناں	رفیق ساگر
ڄم پل	ا فروری 1977ء ، پروآ، ڈیرہ اسماعیل خان
سکونت	پروآ، ڈیرہ اسماعیل خان
استاد شاعر	نصیر سرمد سائروی، گلزار احمد گلزار

خدمات

رفیق ساگر صاحب ہوراں دی ادبی خدمات کہیں توں ڈھکی چھپی کائنی۔ جہانگیر سوز آپݨے ’’ مختصر تعارفی سلسلہ‘‘ وچ لکھدن:
’’ ساگر صاحب انتہائی ادب نواز شخصیت ھن۔ خیبر پختونخوا وچ سرائیکی ادب دی ٻہوں وݙی خدمت کریندے پئے ہن ۔ سرائیکی بزم سرور تحصیل پروآ قائم شدہ 1998 دے سر پرست اعلیٰ ھن۔ ‘‘

رفیق ساگر دے بارے لوکاں دی رائے

رمضان عاطف لکھدن:
’’ ساݙے یار رفیق ساگر موجودہ دور وچ سرائیکی شاعری دا ہک حوالہ ہن انہاں دیاں سرائیکی خدمات بے پناہ ہن اچھے شاعر ادیب ہووݨ دے نال اچھے انسان ہن. ‘‘
اشفاق سحر آہدن:
’’ ٻہوں اچھے انسان ھن شعر و ادب دے نال پیار کریندن۔‘‘
یاسر عرفات آپݨے ’’ تعارفی سلسلہ نمبر ‘‘ وچ لکھدن:
’’ سئیں رفیق ساگر صاحب ہر قاری نال پیار کرݨ آلے استاد شاعر ہن اور رفیق ساگر صاحب دے سرائیکی ادب وچ کافی سارے شاگرد ہن جو صاحب کتاب وی ہن۔ سئیں رفیق ساگر صاحب صوبائی ایوارڈ یافتہ شاعر ہن۔ رفیق ساگر صاحب نے ہر صنف تے لکھے اور ہر صنف تے مکمل عبور رکھدن۔ رفیق ساگر صاحب اسلامی شاعری ٻہوں زیادہ لکھدن اور انتہائی دلچسپ انسان ہن میݙے کیتے اعزاز ھے جو میں سئیں ہوریں دی شاگردی وچ ہاں۔ ‘‘
عصمت گرمانی آہدن:
’’رفیق ساگر مخلص انسان تے یاراں دا یار بہترین شاعر ہے ۔ ‘‘

ایوارڈز

رفیق ساگر صاحب ہوراں ڈھیر سارے ایوارڈ وی وصول کیتن۔ خیبر پختونخوا حکومت انہاں کوں صوبائی ایوارڈ وی ݙتا ہے۔ الطارق ادبی ایوارڈ ۔ اسناد و انٹرنیشنل ایوارڈ وی وصول کیتا ہنیں ۔ جیڑھا کہ انھاں کوں گندھارا بورڈ پشاور توں ملا ہے۔

کتاباں

1. پھونہار
2. جگارے
3. پرکھرا
   رفیق ساگر صاحب ہوراں دی تریجھی کتاب عنقریب چھپ کے آ ویسی

کجھ نمونہ کلام :

ڈوہڑہ

توں خامہ کش ہیں دنیا دا میݙی خامہ لکھسی شان تیݙا

تیݙا قرب قریب ہے شاہ رگ توں سر اکھیں تے فرمان تیݙا

اے بھوئیں تے ساگر ڄو کچھ ہے میݙا مالک ہے احسان تیݙا

کل دین دے کیتے مسلم دا اے نسخہ ہے قرآن تیݙا

غزل

قلندر کݨ سکندر تھی گیا ھاں

میں ہیرا ہم تے پتھر تھی گیا ھاں

میݙے دل اچ ایݙے بت آ وسے ھِن

میں مسجد ہم تے مندر تھی گیا ھاں

کݙاں نئیں عشق دی گرمی ختم تھئی

توݨیں تھل توں سمندر تھی گیا ھاں

سِوا اوندے میکوں کجھ نئیں نظردا

میں اندھا عشق اندر تھی گیا ھاں

جݙݨ دا تئیں رلایاۓ نال اپݨے

کنارا ہم تے ساگر تھی گیا ھاں

قطعہ

چپ چپاتی ہے زندگی میݙی

گنگی ٻاتی ہے زندگی میݙی

سچ الینداں تاں قتل تھی ویساں

توݨیں ذاتی ہے زندگی میݙی