| فکر دا سِجھ ابھردا ہے سوچیندیں شام تھی ویندی |
| خیالاں وچ سکون اج کل گولیندیں شام تھی ویندی |
| انہاں دے بال ساری رات روندن بکھ توں سمدے نئیں |
| جنہاں دی کہیں دے بالاں کوں کِھڈیندیں شام تھی ویندی |
| غریباں دی دعا یارب خبر نئیں کن کریندا ہیں |
| سدا ہنجواں دی تسبیح کوں پھریندیں شام تھی ویندی |
| کڈاہیں تاں ݙکھ وی ٹل ویسن کڈاہیں تاں سکھ دے ساہ ولسن |
| پلا خالی خیالاں دے پکیندیں شام تھی ویندی |
| میڈا رازق رعایت کر نمازاں رات دیاں کردے |
| جو روٹی شام دی پوری کریندیں شام تھی ویندی |
| میں شاکر بھک دا ماریا ہاں مگر حاتم توں گھٹ کائینی |
| قلم خیرات ہے میڈی چلیندیں شام تھی ویندی |
2025-01-13