ہک شام سئیں عزیز شاہد دے نانویں

مٹھاس دی ڳال تھیوے تاں بلاشبہ سرائیکی زبان دا کوئی ثانی نئیں، اوں مٹھاس کو اگر ناں ݙتا ونڄے تاں او ناں سئیں عزیز شاہد اے۔

سرائیکی مرثیہ دی ہک صنف ”ویݨ“ دے موجد، مایہ ناز شاعر، عوام دی ترجمانی کرݨ والا مصنف، ریٹائرڈ سکول ماسٹر، استاد نور محمد سائل دے فرزندِ ارجمند سئیں عزیز شاہد کہیں تعارف دے محتاج نئیں۔

اے سرائیکی ادب دی خوش نصیبی ہے ڄو اینکوں سئیں عزیز شاہد ڄیہاں شاعر ملیے، من موہݨے خیالات کوں سوہݨے الفاظ دان کرݨ والا ہک بے مثال ادیب ڄئیں لفظیں کوں خوشبو دا لباس پووا کے پورے وسیب کوں مہکا ݙتے۔

سئیں عزیز شاہد سرائیکی زبان و ادب دی اونویں آبیاری کیتی ہے ڄیویں ہک حقیقی وارث آپݨی وراثت دا خیال کریندے، سرائیکی شاعری اچ نظم، غزل، گیت، مرثیہ، قطعہ یا رباعی ہر ہک صنف کوں سئیں عزیز شاہد بامِ عروج بخشیے۔ آپ دی تریجھی کتاب “چاک” دی طباعت مکمل تھیوݨ دے بعد سئیں عزیز شاہد کوں ریسکیو ڈیپارٹمنٹ ڈیرہ غازی خان دی طرفوں دعوت افطار تے مدعو کیتا ڳئے، ڄیندے اچ شرکت کر کے سئیں ہوݨیں اساݙا ماݨ رکھیے۔ ایں مختصر تقریب اچ سئیں عزیز شاہد کوں انہیں دی خدمات دے اعتراف اچ “لائف ٹائم اچیومنٹ ایوارڈ” نال نوازیا ڳئے۔ ضلعی آفیسر ریسکیو 1122 انجینئر احمد کمال صاحب ایں تقریب اچ خصوصی طور تے شرکت کیتی اور وسیب دے بے مثال شاعر دا حوصلہ ودھایا۔ ایں تقریب اچ ریسکیو موٹر بائیک انچارج عالمگیر صاحب، خلیل صاحب دے علاوہ دیگر سٹاف وی بھرپور شرکت کیتی۔ سئیں عزیز شاہد کوں خراجِ تحسین پیش کرݨ واسطے غازی یونیورسٹی دے پروفیسر عمران لودھی صاحب، جامپور رائیڈرز دے چیئرمین ڈاکٹر فیصل شہزاد صاحب اور مولویز آن بائیکس دے روحِ رواں مولوی عمران اخگر صاحب خاص طور تے شریک تھئے۔ اساں سارے شرکاء دے تہہِ دل نال مشکور ہیں جنہیں ایں تقریب اچ شرکت کیتی۔ اللّہ مہربان سارے وسیب تے خصوصی لطف و کرم فرماوے، آمین۔

اوویں اوندی کئو ہے عزیزی گزیزی
اوویں اپݨی اندر ہے شَمی نِکمی