| چپ کوں چم چاتے متاں میں نال میݙا ݙر کھلے |
| اسم کئی تھیوے عطا سائیں کئی در کھلے |
| جئیں نکھڑ کے اپݨے اندر مونجھ لہندی نئیں ݙٹھی |
| ایجھے اندھے تئیں بھلا کیا شام دا منظر کھلے |
| جے توݨیں نس نس توں نہ گزرے نکھیڑے دی گھڑی |
| کیا کھلے مستی الستی کیا کوئی محشر کھلے |
| وچ قفس مر ڳیا پکھی اݙرݨ دی سِک وی موئی ڳئی |
| ہݨ کھلی تاکی تاں کیا اکھیاں کھلن کیا پر کھلے |
| کاؤ نہ کر دستک نہ ݙے ہݨ کہیں ڳلی دے موڑ تئیں |
| دل تاں او گھر ھے جتھاں ہر در سَدا اندر کھلے |
| چپ تاں پتھر ھے خود اپݨی حیر تئیں جکڑی ہوئی |
| سر کھلے تاں کھل ونڄے کہیں نال کیا پتھر کھلے |
2024-11-23